মুখ্য পৃষ্ঠা
06/04/2516:00
মৰমৰ অনুৰাগ ,
পাহৰা দিনৰ একাঁজলি মধুৰ বিষাদ বুকুত বান্ধী আজি তোমালৈ বুলি হাতত কলম তুলি লৈছো |আশা ও কামনা কৰো তুমি সুখেৰে আছা |আৰু মই আজিও সুখী তোমাৰ মৰম বুকুত বান্ধী |আন্ধাৰত স্পৰ্শ কৰি চাওঁ বুকুখন ,একেদৰেই আছে তোমাৰ মৰম-ভালপোৱা |মাথো হৃদয়ৰ অসুখ তোমাৰ পৰা আতৰি |
অনুৰাগ ,তোমাৰ বুকুত আশাৰ বীজ সিঁচি ,এদিন ময়ে উঘালি দিলো সপোনৰ অলেখ গজালি |সমাজৰ ভয়ত তোমাৰ পৰা আতৰি মই মুঠেও সুখী নহয় |সময় আৰু নিয়তীৰ তাগিদাত আনৰ সেন্দুৰ কপালত আঁকি ,মই আজি আনৰ বিবাহিতা পত্নী |আৰু হূদয়ৰ অসুখত উচুপি উচুপি পাৰ কৰো প্ৰতিটো ৰাতি |সময়ে সকলো শিকায় ,কাতিৰ ছুটি দিন বোৰৰ দৰেই জীৱনৰ আয়ুস ৰেখা ছুটি হৈ আহিছে |স্বপ্নময় পৃথিৱীৰ হৃদয়হীন প্ৰেমিকা আজি |তোমাৰ নিসংগতাৰ মালা গাঠি ,মোৰ চকুলোৰে তিতে ৰিহাৰ আঁচল |মই হৃদয়হীন সঁচাকৈ অনুৰাগ |মোক বাৰু তুমি এদিন ভালপোৱাৰ স্বাৰ্থতেই ক্ষমা কৰিব নোৱাৰিবানে ?
আই-বোপাই মনত সুখ দি ,তোমাক উপহাৰ দিলো এক নিতংগতাৰ জীৱন |আৰু বিশ্বাসভংগৰ অপৰাধত আজি মই কলংকিতা নাৰী |তুমি ভুল নুবুজিবা অনুৰাগ |সুখী হ'বলৈ চেষ্টা কৰা মোৰ অবিহনে |মোৰে শপত |আজিলৈ এৰিছো |
ইতি
তোমাৰ অনুৰাধা
© ৰাজু কলিতা
23/10/14
